सलमान जस्तै

पाठकहरूले सलमान खानका 'हम दिल दे चुके सनम', 'जुडवाँ', 'प्यार किया तो डरना क्या', 'हेलो ब्रदर' आदि चलचित्र हेर्नुभएकै होला । अब हेर्नुहोस् आर्यन  सिग्देलको 'फर्केर हेर्दा', किनभने उक्त चलचित्रका अधिकांश दृश्यमा आर्यनको अभिनय सलमानको अभिनयको फोटोकपी लाग्छ । संवाद, नृत्य, पहिरन शैली,  चुलबुले अभिनय जहाँ पनि उनले सलमानको स्टाइललाई 'फलो' गरेका छन् ।

अहिलेका अति व्यस्त नायक आर्यन आफैंमा एक सक्षम कलाकार हुन्, यसमा कुनै शंका छैन । आर्यनलाई नजिकबाट चिन्ने सबैलाई थाहा छ— उनी बलिउडका  सलमान खानका 'जबरदस्त फ्यान' हुन् । सलमान खानबाट प्रभावित भएरै होला, उनको जस्तो ज्यान नभए पनि आर्यनले सलमानले जस्तै नाडीमा चाँदीको  मोटो सिक्रीमा स्टोन उनेर लाएका छन् । सलमान ह्यान्डसम पुरुषमा विश्वकै उत्कृष्ट दसमा परेका बलिउड नायक हुन् । युवतीहरू सलमान भनेपछि हुरुक्कै  हुन्छन् । यी साढे चार दशक उमेर काटेका नायकलाई पछ्याउनु हाम्रा चकलेटी नायक आर्यनका लागि राम्रो हुनसक्छ । तैपनि सलमानलाई पछ्याउँदा-पछ्याउँदै  आफ्नोपनचाहिँ हराउला नि ?