नयाँ पत्रिका
सप्तरी, २४
तीन दशक अघिदेखि बाबुले उपभोग गर्दै आएको जग्गा मोहियानी हक लिन सप्तरीका एक छोराले आफ्नी जिउँदो आमालाई मरेको भनी गाविस कार्यालयबाट नक्कली मृत्युदर्ता प्रमाणपत्र बनाएको पाइएको छ । जिल्लाको प्रसवनी-६ का सत्यनारायण मण्डलले आफ्नी ८३ वषर्ीया आमा खुदनीदेवी मण्डलको मृत्यु भएको भनी ५ असोज ०६५ मै गाविस कार्यालयबाट नक्कली मृत्युदर्ता प्रमाणपत्र बनाएको तथ्य खुलेको हो ।
सत्यनारायणका स्र्वीगय बुबा छोटकैन मण्डलले प्रसवनी-६ की भवानीदेवी चौधरीको जग्गा उपभोग गर्दै आएका थिए । त्यसकै मोहियानी हक लिने मनसायले आमा मरेको भनी उनले नक्कली मृत्युदर्ता प्रमाणपत्र बनाएको जिल्ला भूमिसुधार कार्यालय सप्तरीले जानकारी दिएको छ ।
चौधरीको जग्गामा मोहियानी हक कायम गराउन सत्यनारायणले जिल्ला भूमिसुधार कार्यालयमा २ नम्बरको अनुसूची फारम भरी कारबाही चलाएका छन् । सोहीअनुरूप पुनरावेदन अदालत राजविराजले १८ असारमा सो जग्गा आवाद नगर्न/गराउन सत्यनारायणको नाममा अन्तरिम आदेश जारी गरेको थियो । सत्यनारायणले माग गरेको २ नम्बर अनुसूची फाराम नमिलेपछि यससम्बन्धमा भएको छानबिनका क्रममा उनकी आमा जिउँदै रहेको प्रमाण फेला परेको हो ।
भूमिसुधार कार्यालयबाट आफ्नो जग्गामा मोहियानी हक कायम गराइदिन भनी सत्यनारायणले निवेदन दिएको जानकारी जग्गाधनी भवानीदेवी चौधरीले पाएपछि उनले पनि जिल्ला प्रशासन कार्यालय सप्तरीमा 'खुदनीदेवी जिउँदै रहेको र निजका छोराले उनी मरेको भनी नक्कली प्रमाणपत्र बनाएको' भन्दै २ साउनमा निवेदन दर्ता गराएकी थिइन् ।
चौधरीले दिएको निवदेनअनुसार प्रशासनले जिल्ला प्रहरीलाई आवश्यक छानबिन गर्न पत्राचार गरेको थियो । छानबिनपछि जिल्ला प्रहरी कार्यालयले खुदनीदेवी जिउँदै भएको स्थानीय मुचुल्का बनाई पुनः प्रशासनमा प्रतिवेदन पठाएपछि यस्तो तथ्य खुलेको सप्तरीका सहायक प्रमुख जिल्ला अधिकारी होमबहादुर खड्काले नयाँ पत्रिकालाई जानकारी दिए । खड्काका अनुसार २६ साउनमा जिल्ला प्रशासन कार्यालयमा आवश्यक सोधपुछका लागि हाजिर हुनेगरी गाविससचिव केशवकुमार झा र विपक्षी सत्यनारायण मण्डललाई समेत पत्राचार गरिएको छ । यस मुद्दामा दोषी ठहरिने जोसुकैलाई कानुनबमोजिम कारबाही हुने सहायक प्रमुख जिल्ला अधिकारी खड्काको भनाइ छ ।
'
०३४ सालअगावै वर्ष ५० की खुदनीदेवी आफ्नो कालगतिले मृत्यु भएको व्यहोरा प्रमाणित गरिन्छ,' प्रसवनी गाविससचिव झाद्वारा दिइएको मृत्युदर्ता प्रमाणपत्रमा उल्लेख छ ।
तर, गाविस कार्यालयको कागजातअनुसार खुदनीदेवीको उमेर ८३ वर्ष देखाइए पनि आफ्नो उमेर ७० वर्ष मात्र भएको उनको कथन छ । गाविससचिव झाले समेत आफू जिउँदै भए पनि नक्कली मृत्युदर्ता प्रमाणपत्र बनाउन सहयोग गरेको खुदनीदेवीले आरोप लगाइन् ।
यस विषयमा गाविससचिव झाले आफूलाई दिएको निवदेनकै आधारमा त्यस्तो प्रमाणपत्र दिएको स्विकारे । 'आफ्नी जिउँदो आमा मरेको भनी कसले नक्कली मृत्युदर्ता प्रमाणपत्र बनाउँछ र ?,' सचिव झाले भने, 'खुदनीदेवीका छोरा सत्यनारायणले दिएको निवेदनकै आधारमा मैले यस्तो प्रमाणपत्र दिएको हुँ । असुरक्षाका कारण गाउँ डुलेर विस्तृत जानकारी लिने वा मुचुल्का उठाउने वातावारण छैन ।'
0 comments:
Post a Comment