बिग्रिएको प्रेम सम्बन्ध खतरनाक

 
लस एन्जल्स् (एजेन्सी)- भनिन्छ, बिग्रिएको प्रेम सम्बन्धभन्दा खतरनाक केही हुँदैन । यसको उदाहरण मिल्दै छुट्टदै गर्ने हलिउड सेलिब्रेटीहरूले अदालतमा समय-समयमा एक-अर्काको घाँटी थिच्नेसम्मको हर्कतबाट प्रस्ट हुन्छ । पछिल्लो पटक अदालतमा यस्तै घोक्रो थिचाथिच गर्ने जोडीमा नायिका इभा लङ्गोरिया र बास्केटबल खेलाडी टोनी पार्कर परेका छन् ।
सार्वजनिक समारोहहरूमा केही समय अघिसम्म प्रेममा चुर्लुम्मै डुबेको देखिने इभा-टोनीको जोडीले गत शुक्रबारदेखि छुट्टिन कानुनी लडाइँ सुरु गरेका छन् । टोनीले विवाहेत्तर सम्बन्ध राखेको पत्तो पाएपछि 'डेस्पेरेट हाउसवाइभ्स' स्टारले गत बुधबार डिभोर्सको लागि लस एन्जल्सस्थित अदालतमा निवेदन बुझाएकी थिइन् । तर, समस्या तब खडा भयो जब टोनीले पनि शुक्रबार टेक्सासको अदालतमा नायिकाबाट डिभोर्सको लागि निवेदन बुझाए । यसले उनीहरूको डिभोर्स प्रक्रियाको सुरुवातमै समस्या पैदा गरेको छ ।
तीन वर्षअघि धुमधामका साथ विवाह गरेका इभा र टोनीले भिन्न-भिन्न ठाउँमा डिभोर्सको निवेदन दिएकाले डिभोर्ससँगै अर्को युद्ध चल्नेछ । त्यो हो, उनीहरूको डिभोर्स कुन अदालतले गर्ने भनेर । भर्खरै छुट्टिएको यस जोडीको चालढाल देख्दा उनीहरू डिभोर्स गर्ने अदालत र स्थानमा पनि झगडा गर्ने देखिएको स्रोतले बतायो ।
गत साताको सुरुवातसँगै इभा-टोनी डिभोर्सको तयारी गरिरहेको हल्ला चलेको थियो । हल्लालाई कम गर्न उनीहरूका प्रवक्ताले प्रेस विज्ञप्ति
निकाल्दै यो जोडीले डिभोर्स गर्नेबारे सोच्न पनि नसक्ने बताएका थिए । त्यसको पछिल्लो दिन नै ३५ वर्षीया इभाले डिभोर्सका लागि निवेदन दिएकी थिइन् ।
'ओभर माइ डेड बडी' नायिकाले डिभोर्सको लागि लस एन्जल्समा निवेदन दिन लागेकोबारे पहिले नै पत्तो पाएको बताउँदै टोनीले भने, 'अहिले हामी व्यक्तिगत रूपमै समस्याको समाधान गर्न खोजिरहेका छौं ।' पीडादायक समयबाट गुज्रिरहेको बताउँदै उनले दुवैको व्यक्तिगत गोपनीयतालाई सम्मान गरिदिन अनुरोध पनि गरेका थिए । तर, २८ वर्षे खेलाडी आफैंले पनि अर्को अदालतमा डिभोर्स निवेदन बुझाएपछि उनले पत्नीसँग सुल्झाउन खोजेको समस्या थप बल्झिएको छ ।