सावधान यो तपाईको जिन्दगिको सवाल छ

नयाँ पत्रिका

कीरा र लेउ भेटिएको रियल जुस अब संविधानसभाको एउटा संसदीय समितिमा पनि निषेध भएको छ । व्यवस्थापिका संसद्को महिला, बालबालिका तथा समाजकल्याण समितिले रियल निषेध गरेको हो ।

समितिको गत बिहीबार बसेको बैठकमा सभापति सन्ध्या देवीले 'आइन्दा समितिको बैठकमा रियल जुस नल्याउनू' भनी निर्देशन दिएकी थिइन् । समितिको बैठकमा सभासद्हरूका लागि खाजासँगै रियल जुस पनि ल्याउने गरिन्थ्यो । नयाँ पत्रिकाले २५ साउनको अंकमा रियल जुसभित्र कीरा, लेउ र कालो लेदो पदार्थ भेटिएको समाचार 'रियलको रियालिटी' शीर्षकमा प्रकाशित गरेको थियो । कपिलवस्तु, काठमाडौं र पोखराका उपभोक्ताले रियल जुसभित्र स्याउँस्याउँती कीरा, लेउ जमेको र कालो लेदो पदार्थ भेटेको समाचारमा उल्लेख थियो । समाचार प्रकाशित भएको दुई दिनपछि बसेको बैठकमा सभासद्हरूले आपत्ति जनाएपछि सभापति सन्ध्याले समितिको बैठकमा रियल निषेध गरेकी हुन् ।

संयोगले, स्वास्थ्यसम्बन्धी छलफल भइरहेको समितिको सो बैठकमा सभासद्हरूको खाजामा रियल जुससमेत ल्याइयो । त्यही बैठकमा सभासद्हरूले रियल जुससम्बन्धी समाचार प्रकाशित भएको नयाँ पत्रिका बोकेर गएका थिए । नेपालगञ्जमा भएको झाडापखालाबारे अध्ययन गर्न गएको समितिको टोलीले तयार गरेको प्रतिवेदनमाथि बैठकमा छलफल हुँदै थियो ।

खाजामा रियल जुस नै देखेपछि सभासद्हरूले आपत्ति जनाए । 'मिडियामा रियल जुसको वास्तविकता यसरी देखाइएको छ । खाजामा फेरि हामीलाई यही ल्याइएको छ । अब यो कसरी खाने ?' बैठकमा सभासद् विनोद पहाडीले नयाँ पत्रिकाको समाचार देखाउँदै प्रश्न गरे । सर्वसाधारणको जनजीवनमा प्रत्यक्ष प्रभाव पार्ने यस्ता खाद्यपदार्थका बारेमा सम्बन्धित निकाय मौन बसेकोमा पनि सभासद् पहाडीले आपत्ति जनाए । 'समितिले खाद्यपदार्थको गुणस्तर जाँच गर्ने निकायका बारेमा पनि छानबिन गर्नुपर्छ,' उनले भने ।

केही सभासद्ले रियल जुस पिउन थालिसकेको र केही पिउने तयारीमा रहेको अवस्थामा सभासद् पहाडीले यस्तो प्रश्न उठाएपछि सबै गम्भीर बने । पहाडीले उठाएका कुरालाई सभासद्हरू गिरिराजमणि पोखरेल, मिना पुन र गोविन्द नेपालीले पनि गम्भीरता साथ लिए ।

उनीहरूले पनि रियल खाद्यपदार्थको गुणस्तर जाँच गर्ने निकायप्रति रोष प्रकट गरे । 'मिडियामा फोटोसहित यति आउँदा पनि हामी यही खाँदै छौँ । सबैभन्दा पहिला हामी आफैं सचेत हुनुपर्‍यो अनि सर्वसाधारणको स्वास्थ्यसित प्रत्यक्ष सरोकार राख्ने यस्ता कुराहरूमा पनि गम्भीर हुनुपर्‍यो,' सभासद् पोखरेलले भने ।

सभासद् पुनले रियलको बारेमा मिडियामा आएको कुुराप्रति समिति गम्भीर बन्नुपर्ने बताइन् । 'समग्रमा हाम्रो समिति गम्भीर हुनुपर्‍यो । नराम्रो भइसकेपछि केही गर्नुभन्दा सुरुमै ध्यान दिनुपर्छ,' उनले भनिन् । सभासद् नेपालीले पनि खाद्यपदार्थमा देखिएको समस्यालाई समितिले हलुका ढंगले लिन नहुने बताए । उनीहरूले रियल जुसको वास्तविकता मिडियामा आइसकेपछि पनि आफूहरूले त्यस्तो पेयपदार्थ खान नहुने बताए ।

सभासद्हरूको कुरा सुनिसकेपछि सभापति सन्ध्या देवीले समितिको बैठक बस्दा खाजामा रियल जुसजस्ता खाद्यपदार्थ नल्याउन निर्देशन दिइन् । 'बरु चिया-कफी नै खान ठीक हुन्छ । आइन्दा रियल जुस बैठकमा नल्याउनू, निषेध गर्नू,' सभापति सन्ध्याले समितिमा दिएको निर्देशन उद्धृत गर्दै सभासद् विनोद पहाडीले भने ।

आउँदो मंगलबार बस्ने समितिको बैठकमा पनि अखाद्य वस्तुबारे छलफल हुने भएको छ । 'खाद्यपदार्थमा मिसावट मात्रै होइन, मिति नाघिसकेका वस्तुहरू पनि बजारमा छ्यापछ्याप्ती बिक्री भइरहेका हुन्छन् । सम्बन्धित निकाय मौन बसेको छ । त्यसबारे पर्सि (मंगलबार) बस्ने बैठकमा छलफल हुन्छ,' सभासद् पहाडीले भने ।

बिक्री-वितरणमा रोक लगाउन माग

महोत्तरी/ ठाउँ-ठाउँमा रियल जुसमा कीरा र लेदो फेला परेको कुरा सार्वजनिक भएपछि महोत्तरीका उपभोक्ताले विरोध जनाएका छन् । उनीहरूले रियल जुस बिक्री-वितरणमा रोक लगाउन माग गरेका छन् ।

महोत्तरीका प्रमुख व्यापारिक केन्द्र जलेश्वर, मटिहानी, गौशाला, रामगोपालपुर, बर्दिबास, पिपरा, सहोडवा, बलवा, सरपल्लो, सम्सीवरिपरिका बासिन्दाले कीरा र लेदो फेला परेका पेयपदार्थको गुणस्तर चेकजाँच नगरेसम्म बिक्री-वितरणमा रोक लगाउन माग गरेका हुन् । सम्बन्धित निकायले अखाद्य वस्तुहरूको चेकजाँचमा चासो नदेखाएको उनीहरूको आरोप छ ।

जलेश्वर- ५ मा कपडा पसल गरेका मनोज साहले चिसो पेयपदार्थको नाममा अखाद्य पदार्थ उत्पादन गर्ने त्यस्ता कम्पनीलाई तत्काल कारबाही गर्न माग गरे । 'हामीले त जानी-नजानी त्यस्तो पेयपदार्थको माध्यमबाट धेरै अखाद्य वस्तु खाइसक्यौँ । अब भने हामी त्यस्ता अखाद्य वस्तु आफू पनि खान चाहन्नौँ र अरूलाई पनि खान्न दिन्नौँ,' उनले भने । अखाद्य वस्तुहरूको बिक्री-वितरण रोक्न आफूहरूले सक्दो सहयोग गर्ने जलेश्वर उद्योग वाणिज्य संघका महासचिव कृपाशंकर साहले बताए ।